شاعر جديد يتحدى المحبوش ويتفوق عليه

[المحبوش]

اخواني الاعزاء هذه المساجلات التي بيني وبين اخي وصديقي العزيز وابن عمتي رجل الاعمال المعروف
لدينا في منطقة القعيطي والمقيم في الولايات المتحده الامريكيه

واسمه قاسم يوسف صالح الداعري وهو من رجال البر والاحسان
ويقيم هذه الايام في العاصمه الاردنيه عمّان وقد ظهر هاجسه بصوره مفاجئه فهو لم يسبق ولم يسمع احد بانه يقول الاشعار
ولكنه ابتداء هذا المشوار منذو ان وصل الى الاردن وذلك لوجود وقت فراق كبير لديه فما كان منه الا ان توجه باتجاهي
حتى ارهقني بغزارة اشعاره
واليكم مقتطف من هذه المساجلات التي ابتدئناها بزوامل وسوف ترون ماسوف ننتهي اليه
اتمنى ان تحوز استحسانكم
وقد ابتداء في اليوم الذي تعرض فيه الشيخ عبدالله يوسف بن عتيق للحادث المؤسف عندما كنا متوجهين الى منطقه
خلاقه للتوسط بينهم وبين ابناء منطقة ريو في قضية قتل ولكن المشوار لم يكتمل بسبب هذا الحادث المؤسف

قاسم يوسف=
احس في قلبي كئآبه وانفجار=اخبار جتني احرقت قلبي حريق
خطوه بخطوه هات قلي ايش صار=ماذا حدث للشيخ يوسف بن عتيق
انهو خطاء مقبول ولا الف عار=بالغاز والكبريت نحرقها حريق
ابويحيى=
ياشيخ قاسم انت رمزاً للوقار=اهداء ولاتهتم او تجلس بضيق
اهل القعيطي يعجبونك باقتدار=واليوم لاجل الشيخ بالشده فريق
وماحصل ماظن يستدعي شجار=مكتوب من ربه وبالسجل الوثيق
قاسم يوسف=
اخباركم جتنا على سات المدار=كانت تراقبكم وانتم بالمضيق
عديتكم عشرين ذي وتي وسار=وكنت بتأسف وانتم بالطريق
وبن علي عطاف رأسه بالمثار=طويل بالقامه وقد شاف الحريق
ابويحيى=
حيا طويل الجسم ذي خاصم قصار=لكن رحيم القلب بالتالي شفيق
بي خوف يطردني ويوصلني ذمار=ولايهبج بي في سوق الرقيق
خوفي الحليله ذي كسبها واستعار=تفلت على قاسم اذا انزاد الهفيق
قاسم يوسف=
تهرب وبتراوق وتمشي بالمدار=اشتي تجاوبني ولو قولي حريق
لاترتبش وتخاف مانشتيش ثأر=بس كنت اشتي منكم قولاً حقيق
ايش الغلط ذي سببه ذا الانحدار=من دون ماتزعل عليا او تضيق
ابويحيى=
لاذه ولاذه من ظنونك باختصار=بل انقطاع الخط قد كان المعيق
جهازي اتبند ولم يبقى خيار=واليوم بقراء ما بعثته يالشقيق
وانته دلا حاسب وحصف بالسبار=من قبلما الاخطار من حولك تحيق
قاسم يوسف=
ماكان بدي اليوم نبداء بالشجار=لابد يأتي اليوم يلتاح الحقيق
لاوين باتهرب ولا وين الفرار=وهربتك خوفي تقع غير الطريق
باجزعك بين المشاطي والحجار=واحملك افره ومسحتها دقيق
ابويحيى=
باين عليك اعزمت وداري ودار=بشوف قاسم جهز الفاس الذليق
وانا فقط بايكون ماشي لي اعتبار=وذي نويته فوق ما اقدر اطيق
قلنا دلا ياذاك خفف بالعيار=مادام عادك بالنسم وانته طليق
اصورتني طراب متجهز بطار=وانا بنقي لك من الزهر الرحيق
اول تعاين لك مساعد مستشار=ولاتخذ دوره وتتوجه لحيق
اقنع معيا ماتذوق الانتصار=حتى ولانا كنت في موسم حزيق
قاسم يوسف=
صداقتي صلبه ولافيها انحدار=مبنيه فوق الصح بالصلب الوثيق
ولايقع فيها تصدع وانهيار=مهما تسبب لي مرض نفسي وضيق
وعزت الله مامعي غيرك خيار=انت الوفاء ياصاحبي وانت الصديق
بعض المشاكل حلها عبر الحوار=وبعضها عبر المخمس والذليق
لاجل القرابه والصداقه والجوار=صفحه جديده نبتدي فيها نصيق
الصدق والاخلاص رمزي والشعار=وغير هذا ياصديقي مايليق[/QUOTE]

[المحبوش]

قاسم يوسف=
نبدع بمن هو في البدايه والختوم = وهو الذي يملك حياتي والممات
هوذي نصلي له وله ايضا نصوم = وهو امرنا في اداء الخمس الصلاة
هابعد يالجوال لاانويت العزوم = عبر الثريا والبروج العاليات
شل الرساله محتواها والعلوم = وماشرحته لك بكل المعطيات
اقصد ابويحيى عسى قدره يدوم = واعطه اجمل ورد واجمل عينات
سلام لك يانجم من فوق النجوم = ياذي لك التاريخ سجل ذكريات
طيب مع الطيب وحاسم للخصوم = كريم بالاخلاق واحسان الصفات
واتخبره عن ذا سكوته والكتوم = قله يحافظ في امور التاليات
هل هو تركن لي وجاهز للهجوم = ام هو مضيع بالصحاري العاميات
قنابلي جاهز وانواع السهوم = ايضا مجهز لك عتادي والمشات
مشتي يفكر يوم عقله او يسوم = ولايفكر بي وهو مدكي بقات


ابويحيى=
ياهاجسي صحصح باوقات اللزوم=صد الصواريخ الذي جت عابرات
من عند شاعر طمه الهاجس طموم=ماعاد خلي لي من التركه فتات
وشل ايضا ما مع اولاد العموم = يهوين ع الماضي علينا كيف فات
باقول ياحيا وسهلا بك قسوم = ماينذلح شلال من نهر الفرات
مالراعد اتحرقد من بين الغيوم= والبرق يضوي بالليالي المظلمات
قولك على راسي ولو بينه سموم = وانته زرعت الباقيات الصالحات
محبوش لاعاهد على عهده يدوم =ولاحمل قلبه لاحبابه حنات
لكن على شانك بجدمها كسوم=لكن على عهدي وواقف في ثبات
وبنصحك تحصف ولاتراجم بدوم =رع عادها بعد الرده عدة ردات
وهاجسك ندعو من المولى يدوم= مابه سخى يهلك وهو عاده نبات
وبهم لاترجع في التالي تلوم=ولا رع المحبوش متوسل سرات
قاسم يوسف=

يشهد لي العالم صديقي والخصوم=من غرب نهر النيل لاشرق الفرات
نظف اذونك لو في اذونك صموم=وافحس عيونك لوعيونك ناعسات
الجو متكهرب ومن حولك لقوم=واليد فوق الزر بطلق عابرات
نمار تتناهم وباتجيبك خطوم=بتجي ولوهي في الوكور الرابيات
حتى الافاعي ذي ثناياها سموم=ذله وجتني والمذارب ذابلات
مشتيك تتحدا ومن بعد تلوم=شف الندم وارد وما ريد الحنات
مانا صعه تلحس ونا بطلق تموم=جليل ماتخطي قروني ملويات
ببقا انا واقف وماسك للزموم=واذا رميت الخصم رميي ماحقات

ابويحيى=
لايقترب للبحر الا من يعوم=ولا هلك من موج تقبل عاتيات
واسرارها عندي اذا قاسم كتوم=لاتحسب الساحه بتقبل لنفلات
لو لك بها رغبه فجهزت الرسوم=جهز مسبك والطلب بايدك وهات
تشجيع لك باحط لك بعض الخصوم=من مخزن المحبوش حمل لك فيات
اما كذا مجان ما اتشمه شموم=قنته كذا مشييخ جند بالسكات
ويش اكلفك تدخل معي والجو حوم=شف تالي اللعبه عواقبها شمات
باسامحك ذلحين واعفي عالعموم=لنته تبي تسبح تعلم بالقلات
ماحد يقارب شر من حوله يحوم=وهو على الباطل تكبر واستمات
لكن على نفسك قد اصبحت الظلوم=اما الندم وقته قد اتقهقر وفات[/QUOTE]

[المحبوش]

بدع موجه من كلمات محمد يحيى المحبوش
الى الشاعر قاسم يوسف صالح الداعري



ياطير شمر باجنحتك الى الاردن=هذا كتابي عليه الاسم والعنوان
حالاً توكل بسرعه قدر مايمكن=لاعند شاعر وانا من فرقته ضجران
بلغ سلامي مع العود النقي الاثمن=واصدق تحيه بعطر المسك والريحان
للشاعر المجتهد قاسم قده افطن= في محتوى الخط والمعنى مع القيفان
وسلمه ورد ينفح في شذا السوسن=ذي اسمه متوّج مع اهل البر والاحسان
سلام له مالمطر من عالغمامه شن=والسيل سيل ومنه ترتوي الوديان
واشمل سلامي لمن عنده في المسكن= ذي حوّل الله له وامسوا معه جيران
قله فرحنا معه هاجس بيتفنن=يبني حجار الظهاره جودها بطان
جالس مخبا معه مكنوز بالمدفن= واليوم عبر الفضاء بادر في الاعلان
قد كان يامسكنه حتى انه اتمكن=واليوم بيصدر النشرات من عمّان
واقبل مهرول لساحتنا ولا استأذن=مايدري انا بساحات الادب سُلطان
لابد ما نفحصه من قبل ما نأذن=وربما لو رسب مايجوز له قبلان
واللوم كله على ذي عندهم خزّن=اولهم الشيخ واصحابه من الاعيان
ماغيره الشيخ ذي حرش وذا طنن=اعما زقر له جراده زقرت العميان
اريه ضدي يبينا بانقع مكبن= لما اقنعه يدخل الساحه بلا استئذان
وخُطت الشيخ تكتكها له الكبتن=المستشار الذي عندي في الديوان
لما كشفته وقال الشيخ ذي وثن=سيني غريمه على ماقال بن حيان
طبعه تغير علي من حل ما اتمدن=ونا ويوسف بنه اكثر من الاخوان
ببري منصر لان ماله صله بالفن=تخصصه بس بالشمه وبالخزان
ماظن اثنى غيابه عننا اتفرعن=واصبح يبيع المجوره بابخس الاثمان
للآن عاده بميزاني هو الارزن=لما نصفي الخبر وايطلع الميزان
والآن يابن علي عطاف قر وافهن=مابايفيدك ندم لاقنت بالميدان
العين بالعين لو ماشي بقي بي سن=الحمد لله جنبي معمل الاسنان
باحذرك قبلما تشمخ وتتعفين= لوتقترب ساحتي بادرزنك درزان
والقرش بيبان من صوته متى ما طن=انا الذي بيدي المُزرع رجع صيفان
قبل آتفك الربت اتفقد المخزن=لادون ماهل معك ثنتين ابودُخان
ذكر النبي كلما الراعد بصوته حن=وما شخوب المطر صبه من الامزان[/QUOTE]

[المحبوش]

جواب الشاعر قاسم يوسف صالح الداعري
على قصيدة محمد يحيى المحبوش

يامن لها جلها يامن بك استأمن=يامُحيي الروح يامن فيك لطمئنان
يامن اذا ضيق صدري فيك بتعون=وفيك تجلاء هموم الهايم الحيران
حنين حنيت من جوفي وقلبي حن=والدمع سيّل بذكر الواحد الرحمن
قم يارسولي بعز الليل واتوهن=عبر الثُريا ترحل وانزل الميسان
خذ من وروده زهور الفل والسوسن=ومن صخوره تنقي الماس والمرجان
وبحفظ رب السماء في خط قاسم حن=لاتهبط الا على قمة جبل شمسان
واجزع طريق المعلا لي بها مسكن=ولي حبايب بها حلوا ولي خلان
وبلا توقف طريق الجسر لك اظمن=واحذر تضيع في الجولات والاروان
واسأل على ورشة المحبوش ذي حصن=سلم لعمالها واطلع قدا الديوان
صافح عليهم من الايسر الى الايمن=جانب في اليد والباقين بالاحضان
وتالي الناس تلقى شخص متكهون=جالس على الباب ياهشاش للذبان
هذا ابن خالي ولكنه بيتهوّن=بيحسب انه لوحده فارس الفرسان
اكيد فاقد لحسه او قد اتجنن=وبالتوازن فقد للكيل والميزان
ياصاحبي لوطواك النوم قوم واذهن=ورد لي باعتذارك دون استهوان
كنت انتظر تتصل فينا لتتطمن=لكن اسف قمت واتسرعت بالعدوان
العيش والملح لايُنسى ولايهون=ولاشجاعه تجي في كثرت الوثان
هذا قميصي وذا شالي وذا المصون=ارجو تصون الوفاء ذي بيننا قد كان
وصاحبي ما اطرحه بابيع له وارهن=اما عدوي برده ذاعن الآذان
ما داعري يوم قالوا ذل ولا دن=جذورها ملتويه عامده لركان
لو مد في بندقه بيصيب لا اتزكن=مايرتهب من بشر عادي ولاشيطان
اما عن الشيخ جرحك والالم مُزمن=ماتدخله معركه انته بها الخسران
الشيخ قدم واخلص في الوفاء واحسن=وقام في واجبه اكثر من أي انسان
مقدام واهل القعيطي فيه تتحصن=حاز الوفاء في صلاح الاهل والجيران
ذكر النبي مالقلم بحروفها دون=محمداً ذي تشفع لي من النيران
[/QUOTE]

[المحبوش]

بدع من كلمات الشاعر قاسم يوسف الداعري
مرسل الى محمد المحبوش






قم يارسولي على ظهر الفرس لسود=عبر الصحاري طُرق وعره ومُمتدّه
عاريه جرداء صحاري طولها يمتد=عبر السعوديه فيها اكوادها امتده
ومُر جيزان لي به يارسولي حد=واطراف ارض اليمن فيها بلغ حده
عساك في رحلتك يامُرسلي تسعد=وارض السعاده مزارع والطُرق برده
واجزع مدينة ازال تاريخها مُمتد=اصل الحضارات والتاريخ في مجده
واعبر مكيراس ذي بعده ثره تعتد=واحد وخمسين فيه اروان معتده
واتوصل ابين وفيها سير واترود=خليك بالساحليه والحق الرصده
لاقنت بالدار في مخبازته اتغد=واتوجه المنجره خزن مع العُمده
سلم على اصحابنا كعادتك باليد=وحب لي الخال ابوقاسم على خده
سلّم ملفي مختّم بصمتي امعمد=شيخ المشايخ ابويحيى الى يده
يفتح كتابي ولغزي فيه عود الند=وفي غلافه مدمق غُصن به ورده
معاد باطيق لاقواله ولا اتنهد=بايخرج الضيق قاسم ذي على نهده
اشتيك تسمع لابياتي وتتعود= شف الفتى قال انا ماينفعه جده
صراعنا حرب باتحمى وباتشتد=وبنصحك يامحمد لوذ بالشرده
اشتيك تحسب حساباتك وتتأكد=من قبل ما تطلب الاسعاف والنجده
والخير لوتنسحب من ظربي المعمد=اسحب من الساحه الحمراء في البرده
سلاحي السيف والخنجر معي مُجرد=والبندقيه تراها الموت لاامتده
ياليت سالم وقاسم بن عوض يوجد=كان آيشوفوا الخلف ذي بعدهم ردّه
قاسم وصالح وابويحيى وذيهم بعد=عليهم آينطبق ياخلفة اللده
سبعين رامي اذا عديتهم تعتد=لكن اسف ذه خلف دبراء في العده
بس الامل هو في الاشبال ذي تصعد=بانختبرهم اذا اوزارها اشتده
كني برى النور باطراف النفق لسود=وبعرف الرامي الحتام بالمده
اختم بقولي بمن في خاطري معمد=بالله ذي لاحدا قبله ولابعده[/QUOTE]

[المحبوش]

جواب محمد المحبوش
على الشاعر قاسم يوسف صالح الداعري



محبوش مفهن ومدكي له بقات اجرد=والهاجس اورد قفا ما ابوابه استده
لما لمحت النصع ذي بان واتحدد=صممت ما اخطيه مالي عذر من قفده
لاقلت برثي فمن بايدرك المقصد=وذي تجاهي بيتفرع على الهده
باليوم منشور لاخباري بيترصد=لوقلت بتجاهله مايلتزم حده
باقول يامرحبا بالفارس المُجهد=بالشاعر المُبتدي والله ما عنده
ومن معي رحبوا من ريو لامرفد=ومن كلد لاحطيب الكور للفُرده
قالوا ملزّم تعجّل يافتى بالرد=وانا الذي بالشدد بشتد لا اشتده
اول سلامي لقاسم بالوفاء والود=يشمل من اتواجدوا ساعة يصل عنده
سلام مالطير فوق اغصانها غرّد=بالورد ذي له غطفته بالرشح ندّه
من دون تمييز صافحهم سوى وازهد=بالعدل لاذا يخذ نشته وذا زهده
اولهم الشيخ واهده عطر ذي نوّد=عاده وصلني من الدكتور في جده
عيبه فقط صاحبه ولا فلايُنقد=شيخ المشايخ وابويحيى على عهده
لاسامحه ذي فتن من بيننا وافسد=عسى غيابه يفك الحرز والعُقده
ونعود لاعهدنا مانختلف سرمد=والنائب لمُفتري با تفتقش كبده
اما منصر فقله سره اتفند=لابده آنحتكم حاضر كما بده
ما اخطيت نحوه وخطي عندكم يشهد=الا اذا بطل الشمه بها نقده
وخص صالح عوض لاجي بيتفقد=احوالكم له تحيه خاصه وحده
واقراء كتابي ووثق كامل المشهد=والجيد بيميز الاصلي من الخُرده
ماتغمض العين الا الدين يتسدد=واخطف هدف وابتدي هجمات مُرتده
قله على من بتتهروي وتتوعد=والحق في قبضتي ملكي ونا بعده
لاتفتح ابواب يمكن صعب تتبند=تحديدها في يدي بالكيف والمُده
غيرك حلم مثل حلمك لكن اتبدد=محبوش ماداعري يحلم يقع نده
كنوز تاريخنا بالمجد تتخلد=ورحمة الله تغشى الجد لا لحده
ذي وطخ الساس لي من اجل باشيد=مدماك تعجز جيوش الارض في هده
وكل طامع بها لابد يتنكد=وشفرتك يبن يوسف بالذحل صده
ونك سمق تقترب بركان يتوقد=شف باطلّع السيف لك مخصوص من غمده
والبحر ملكي بوقت الجزر ولا المد=والخصم قسمه هبا منثور في جهده
ختامها بالنبي ما الراعد اتحرقد=من مُزن ممطر بميزها من الرعده
صلاه تغشاه مالماطر سكب واضمد=واتحمد الله ذي اوجب علي حمده[/QUOTE]

[المحبوش]

والبقيه تاتي

[ابومازن القاضي]

منتظرين البقية على شوق معرفة الجديد
وصاحبك يا ابا يحيى نابغة العصر الحديث
ولا يستهان بمثل تلك الحليلة وذاك الهاجس
والمحبوش لها طبعا , اسجل الاعجاب بما
خطت الاقلام وفي انتظار الجديد وللشعراء
التحية والود